Capacity Building Workshop under Project "Establishment of a Comprehensive Plan for a Cross-Border Checkpoint Facility at Cambodia’s International Border Trapeang Srae" in Republic of Korea
27 March 2023
ទីក្រុងសូល សាធារណរដ្ឋកូរ៉េ៖ ថ្ងៃទី២៦ ខែមីនា ឆ្នាំ២០២៣ រហូតដល់ថ្ងៃទី១ ខែមេសា ឆ្នាំ២០២៣ ឯកឧត្តម ឈៀង ពេជ្រ អគ្គនាយក នៃអគ្គនាយកដ្ឋានភ័ស្តុភារកម្ម បានដឹកនាំថ្នាក់ដឹកនាំ និងមន្ត្រីបច្ចេកទេសចំណុះអគ្គនាយកដ្ឋានភស្តុភារកម្ម ព្រមជាមួយការចូលរួមពីអាជ្ញាធរតំណាងមកពីច្រកទ្វាព្រំដែនអន្តរជាតិត្រពាំងស្រែ ចូលរួមសិក្ខាសាលាកសាងសមត្ថភាពមន្រ្តីរាជការ នៅសាធារណរដ្ឋកូរ៉េ។
សិក្ខាសាលាកសាងសមត្ថភាពរយៈពេល ៧ថ្ងៃនេះរៀបចំឡើងដោយក្រុមការងាររបស់ក្រុមហ៊ុន SAMOOCM ARCHITECTS & ENGINEERS ក្រោមគម្រោង Establishment of a Comprehensive Plan for a Cross-Border Checkpoint Facility at Cambodia’s International Border Trapeang Srae ដែលជាគម្រោងស្ថិតក្នុងក្របខណ្ឌជំនួយអភិវឌ្ឍន៍ផ្លូវការ តាមរយៈក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន នៃសាធារណរដ្ឋកូរ៉េ។ ក្នុងអំឡុងពេលនៃសិក្ខាសាលា និងទស្សនកិច្ចសិក្សានេះ គឺមានការបណ្ដុះបណ្ដាលចែករំលែកបទពិសោធន៍ និងចំណេះដឹងលើប្រធានបទដូចជា (១)ការព្យាករណ៍តម្រូវភ័ស្តុភារកម្ម (២)ការរៀបចំផែនការក្នុងការរៀបចំអគាររដ្ឋបាលនៅច្រកទ្វារព្រំដែន (៣)ប្រព័ន្ធច្បាប់គោលនយោបាយគយរបស់សាធារណរដ្ឋកូរ៉េ (៤)កិច្ចព្រមព្រៀងពាណិជ្ជកម្មសេរី រវាងសាធារណរដ្ឋកូរ៉េ និងកម្ពុជា។
សិក្ខាសាលាកសាងសមត្ថភាពនេះ ក៏បានផ្ដល់ឱកាសឱ្យសិក្ខាកាម ស្វែងយល់បន្ថែមអំពីវិស័យភ័ស្តភារកម្ម នៅសាធារណរដ្ឋកូរ៉េ ដោយបានចុះទស្សនកិច្ចសិក្សាផ្ទាល់នូវទីតាំងប្រតិបត្តិការវិស័យភស្តុភារកម្មមួយចំនួនដូចជា៖(១)ស្ថានីយអ្នកដំណើរអន្តរជាតិនៃកំពង់ផែអ៊ីនឆុន (Incheon International Ferry Terminal) (២)កំពង់ផែផ្នែកខាងក្នុងនៃកំពង់ផែអ៊ីនឆុន (Incheon Inner Port) (៣)មជ្ឈមណ្ឌលភស្តុភារកម្មឆ្លាតវៃរបស់ក្រុមហ៊ុន SINL និងក្រុមហ៊ុន SNCT (Sun Kwang Container Terminal)។
ចុងបញ្ចប់នៃសិក្ខាសាលាកសាងសមត្ថភាពនេះ ឯកឧត្តមអគ្គនាយក ឈៀង ពេជ្រ បានថ្លែងអំណរគុណជូនដល់ក្រុមការងាររៀបចំសិក្ខាសាលានេះ ជាពិសេសដល់ក្រុមហ៊ុន SAMOOCM ARCHITECTS & ENGINEERS ដែលបានទទួលស្វាគមន៍យ៉ាងដិតដល់ និងបានរៀបចំការបណ្ដុះបណ្ដាលរំលែកបទពិសោធន៍ និងចំណេះដឹង មកកាន់ប្រទេសកម្ពុជា។
