គម្រោងអភិវឌ្ឍសេវាកម្មដឹកជញ្ជូនតាមកាណូត (Taxi Boat) (P15-S2)
គម្រោងអភិវឌ្ឍសេវាកម្មដឹកជញ្ជូនតាមកាណូត (Taxi Boat) មានគោលបំណងជួយលុបបំបាត់បញ្ហាការកកស្ទះចរាចរណ៍ និងកាត់បន្ថយគ្រោះថ្នាក់នៅក្នុងរាជធានីភ្នំពេញ ដោយផ្តល់ជូនសេវាកម្មដោយប្រើប្រាស់នាវា ០៤គ្រឿង ដែលនាវានីមួយៗអាចផ្ទុកអ្នកដំណើរបាន ៦០នាក់ក្នុងពេលតែមួយ ហើយដំណើរការចាប់ពីម៉ោង ៦ព្រឹក ដល់ម៉ោង ៦ល្ងាច ជាមួយនឹងការធ្វើដំណើរលើផ្លូវទឹកឆ្លងកាត់ស្ថានីយចំណតទាំងប្រាំកន្លែង ដែលមានទីតាំងនៅឬស្សីកែវ ផ្សារចាស់ ណាហ្គាវើលដ៍ ច្បារអំពៅ និងតាខ្មៅ។ សេវាកម្មនេះ អាចទាក់ទាញភ្ញៀវទេសចរឱ្យរីករាយនឹងដំណើរកម្សាន្ត តាមដងទន្លេក្នុងរយៈពេលខ្លី។
គម្រោងនេះត្រូវបានអនុវត្តដោយក្រសួងសាធារណការ និងដឹកជញ្ជូន ដោយប្រើប្រាស់ថវិកាជាតិ និងបានបញ្ចប់រួចរាល់ រួចបានផ្ទេរប្រតិបត្តិការទៅរដ្ឋបាលរាជធានីភ្នំពេញ។ ដោយផ្តល់នូវអត្ថប្រយោជន៍រួមមាន ការធ្វើឱ្យប្រសើរឡើងនូវការដឹកជញ្ជូនតាមផ្លូវទឹកនៅក្នុងរាជធានីភ្នំពេញ និងការបង្កើតឱកាសអាជីវកម្ម នៅតាមដងទន្លេសាប ទន្លេបាសាក់ និងទន្លេមេគង្គ។