- ទំព័រដើម /
- វិស័យ /
- វិស័យហេដ្ឋារចនាសម្ព័ន្ធ /
- ផ្លូវផ្នល់
ផ្លូវផ្នល់
នៅប្រទេសកម្ពុជា បណ្តាញផ្លូវថ្នល់ និងហេដ្ឋារចនាសម្ព័ន្ធត្រូវបានពង្រីក និងកែលម្អឡើងដើម្បីលើកកម្ពស់វិស័យដឹកជញ្ជូនប្រកបដោយប្រសិទ្ធភាពខ្ពស់ និងមានការចំណាយកាន់តែប្រសើរសម្រាប់វិនិយោគិនក្នុងស្រុក និងបរទេស។ ផ្លូវថ្នល់ត្រូវបានបែងចែកជាផ្លូវជាតិ (១ ខ្ទង់ និង ២ ខ្ទង់) ផ្លូវខេត្ត (៣ ខ្ទង់ ឬ ៤ ខ្ទង់) និងផ្លូវជនបទ។ មានក្រសួងចំនួនពីរដែលគ្រប់គ្រងលើការងារផ្លូវទាំងនេះ៖ ១) ក្រសួងសាធារណការ និងដឹកជញ្ជូន (MPWT) គ្រប់គ្រងលើផ្លូវជាតិ និងខេត្ត និង ២) ក្រសួងអភិវឌ្ឍន៍ជនបទ (MRD) គ្រប់គ្រងលើផ្លូវមិនទាន់ក្រាលកៅស៊ូ ឬផ្លូវលំនៅតំបន់ជនបទ។ ប្រវែងសរុបនៃបណ្តាញផ្លូវថ្នល់ដែល MPWT គ្រប់គ្រងត្រូវបានពង្រីកបន្ថែមពី ១៦.៥៦៩ គីឡូម៉ែត្រនៅឆ្នាំ២០១៩ ដល់ ១៨.១២៥ គីឡូម៉ែត្រនៅឆ្នាំ២០២០។
ប្រវែងបណ្តាញផ្លូវថ្នល់នៅប្រទេសកម្ពុជាឆ្នាំ ២០២០
បណ្តាញផ្លូវថ្នល់នៅប្រទេសកម្ពុជា
ការអភិវឌ្ឍហេដ្ឋារចនាសម្ព័ន្ធផ្លូវថ្នល់នៅកម្ពុជាមានការរីកចម្រើនគួរឱ្យកត់សម្គាល់។ ទីមួយ គឺគម្រោងផ្លូវល្បឿនលឿនភ្នំពេញ-ព្រះសីហនុ។ នេះគឺជាផ្លូវល្បឿនលឿនដំបូងគេនៅកម្ពុជា ដែលមានប្រវែងសរុប ១៩០ គីឡូម៉ែត្រដោយចំណាយថវិកាសាងសង់ ១,៩ពាន់លានដុល្លារអាមេរិក និងបានចាប់ផ្តើមនៅខែមីនា ឆ្នាំ២០១៩ ហើយរំពឹងថានឹងបញ្ចប់ការសាងសង់នៅឆ្នាំ២០២៣។ ទីពីរ គឺគម្រោងហេដ្ឋារចនាសម្ព័ន្ធផ្លូវថ្នល់ក្នុងខេត្តព្រះសីហនុ។ គម្រោងនេះគ្របដណ្តប់ផ្លូវចំនួន ៣៤ខ្សែ មានប្រវែងសរុប ៨៤,៥ គីឡូម៉ែត្រដោយចំណាយថវិកាសរុប ២៩៤ លានដុល្លារអាមេរិក ហើយការសាងសង់បានចាប់ផ្តើមនៅខែវិច្ឆិកា ឆ្នាំ ២០១៩ ហើយបានបញ្ចប់នៅខែធ្នូ ឆ្នាំ២០២១។ ទីបី គឺគម្រោងកែលម្អហេដ្ឋារចនាសម្ព័ន្ធផ្លូវថ្នល់ក្នុងក្រុង និងខេត្តសៀមរាប។ គម្រោងនេះគ្របដណ្តប់ផ្លូវចំនួន ៣៨ខ្សែ មានប្រវែងសរុប ១០៩ គីឡូម៉ែត្រដោយចំណាយថវិកាសរុបប្រមាណ ១៥០ លានដុល្លារអាមេរិក ហើយការសាងសង់បានចាប់ផ្តើមនៅខែវិច្ឆិកា ឆ្នាំ២០២០ និងបានសម្ពោធដាក់ឱ្យប្រើប្រាស់នៅខែមេសា ឆ្នាំ២០២២។
