គម្រោងអភិវឌ្ឍន៍មជ្ឍមណ្ឌលបណ្ដុះបណ្ដាលបច្ចេកទេសភ័ស្ដុភារកម្ម (ដំណាក់កាលទី១) (P41-S1)
ដើម្បីដោះស្រាយបញ្ហាកង្វះខាតអ្នកបើកបររថយន្តដឹកទំនិញធុនធ្ងន់ ដែលមានជំនាញច្បាស់លាស់ ក្រសួងសាធារណការ និងដឹកជញ្ជូន ដែលមានអគ្គនាយកដ្ឋានដឹកជញ្ជូនផ្លូវគោក បានបង្កើតមជ្ឈមណ្ឌលបណ្តុះបណ្តាលបើកបរយានយន្តធុនធ្ងន់ ក្នុងខែវិច្ឆិកា ឆ្នាំ២០១៨ ដោយបានបណ្តុះបណ្តាល និងផ្តល់បណ្ណបើកបររថយន្តធុនធ្ងន់។ ក្រសួងបានសាងសង់នូវមជ្ឈមណ្ឌល បណ្តុះបណ្តាលបើកបរយានយន្តធុនធ្ងន់ ដែលបានសម្ពោធដាក់ឱ្យដំណើរការជាផ្លូវការ នៅថ្ងៃទី០៤ ខែកុម្ភៈ ឆ្នាំ២០២១ នៅតាមបណ្តោយផ្លូវជាតិលេខ៥ សង្កាត់សំរោង ខណ្ឌព្រែកព្នៅ រាជធានីភ្នំពេញ ដើម្បីបណ្តុះបណ្តាល និងបង្កើនអ្នកបើកបររថយន្តដឹកទំនិញធុនធ្ងន់ដែលមានជំនាញច្បាស់លាស់ឱ្យសមស្របនឹងបទដ្ឋានអន្តរជាតិ។
គម្រោងត្រូវបានអនុវត្តដោយ អគ្គនាយកដ្ឋានដឹកជញ្ជូនផ្លូវគោក។ បច្ចុប្បន្ន គម្រោងនេះកំពុងដំណើរការ ដោយវឌ្ឍនភាពគម្រោងសម្រេចបាន ១៥%។ ជាក់ស្តែងសកម្មភាពគោលស្ថិតក្រោមគម្រោងនេះ មានដូចខាងក្រោម៖
- វាយតម្លៃ និងវិភាគស្ថានភាពបច្ចុប្បន្ន សម្រេចបាន ៨៥%
- បង្កើតផែនការអភិវឌ្ឍន៍សាលាបើកបររថយន្តដឹកទំនិញធុនធ្ងន់ (ផ្នែកទន់) សម្រេចបាន ៩៥%
- បង្កើតផែនការអភិវឌ្ឍសាលាបើកបររថយន្តដឹកទំនិញធុនធ្ងន់ (ផ្នែករឹង) សម្រេចបាន ៧៥%
- អនុវត្តផែនការសាលាបើកបររថយន្តដឹកទំនិញធុនធ្ងន់ សម្រេចបាន ១៥%។
គម្រោងនេះ ក៏មានជួបនូវបញ្ហាប្រឈមរួមមាន៖ កង្វះខាតធនធានមនុស្ស, តម្រូវការក្នុងការចំណាយ និងពេលវេលាសម្រាប់បណ្តុះបណ្តាលបន្ថែម, និងកង្វះខាតសឺមីរ៉ឺម៉កសណ្តោង (semi-trailers)។ ឆ្លើយតបនឹងបញ្ហានេះ ក្រុមការងារក៏បានស្នើនូវដំណោះស្រាយមួយចំនួន រួមមាន បញ្ចុះតម្លៃសេវាបណ្តុះបណ្តាល, និងកាត់បន្ថយម៉ោងបណ្តុះបណ្តាល និងស្នើសុំផ្តល់ឯកសារបណ្តុះបណ្តាលដោយឥតគិតថ្លៃ។