សិក្ខាសាលាស្តីពី «ការគ្រប់គ្រងទិន្នន័យដឹកជញ្ជូន និងភ័ស្តុភារកម្ម»
២៩ ឧសភា ២០២៣
ថ្ងៃទី២៩ ខែឧសភា ឆ្នាំ២០២៣ លោកស្រី សន សុភាវត្តី អគ្គនាយករង នៃអគ្គនាយកដ្ឋានភ័ស្តុភារកម្ម បានដឹកនាំសិក្ខាសាលាស្តីពី «ការគ្រប់គ្រងទិន្នន័យដឹកជញ្ជូន និងភ័ស្តុភារកម្ម» (Online Workshop for Transport and Logistics Data Management) ដោយមានការចូលរួមតាមប្រព័ន្ធអនឡាញ ដោយតំណាងមកពី National Economic and Social Development Council (NESDC) និង Office of Transport and Traffic Policy and Planning (OTP) នៃប្រទេសថៃ, Transport Development and Strategy Institute (TDSI) និង Ministry of Industry and Trade (MOIT) នៃប្រទេសវៀតណាម, ក្រសួងសាធារណការ និងដឹកជញ្ជូននៃប្រទេសឡាវ, និងនាយកដ្ឋានពាក់ព័ន្ធ នៃអគ្គនាយកដ្ឋានភ័ស្តុភារកម្ម ក្រសួងសាធារណការ និងដឹកជញ្ជូននៃប្រទេសកម្ពុជា។
សិក្ខាសាលានេះ ត្រូវបានរៀបចំឡើងក្រោមជំនួយបច្ចេកទេសគម្រោងធ្វើឱ្យប្រសើរឡើងនូវប្រព័ន្ធភ័ស្តុភារកម្មនៅកម្ពុជា ជំហានទី២ (The Project for Improving the Logistics System of Cambodia – Phase 2) របស់ ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ក្នុងគោលបំណងចែករំលែកបទពិសោធន៍ ក្នុងការគ្រប់គ្រងទិន្នន័យដឹកជញ្ជូន និងភ័ស្តុភារកម្ម និងពង្រឹងកិច្ចសហប្រតិបត្តិការជាមួយ ស្ថាប័នជំនាញនៃប្រទេសក្នុងតំបន់។ ស្ថិតក្នុងសិក្ខាសាលានេះ មានការធ្វើបទបង្ហាញលើប្រធានបទសំខាន់ៗ រួមមាន៖
១) បទបង្ហាញស្តីពី លទ្ធផលដែលទទួលបានក្នុងការសិក្សា (Key Findings) ដោយ ជំនាញការ JICA ២) បទបង្ហាញស្តីពី ការគ្រប់គ្រងទិន្នន័យដឹកជញ្ជូន និងភ័ស្តុភារកម្ម ដោយអគ្គនាយដ្ឋានភ័ស្តុភារកម្ម នៃក្រសួងសាធារណការ និងដឹកជញ្ជូន នៃប្រទេសកម្ពុជា ៣) បទបង្ហាញស្តីពី ការគ្រប់គ្រងទិន្នន័យភ័ស្តុភារកម្មនៃប្រទេសថៃ ដោយ Logistics Development Strategy Division នៃ NESDC ប្រទេសថៃ ៤) បទបង្ហាញស្តីពី ការគ្រប់គ្រងទិន្នន័យដឹកជញ្ជូន និងភ័ស្តុភារកម្ម ដោយ Office of Transport and Traffic Policy and Planning (OTP) នៃប្រទេសថៃ ៥) បទបង្ហាញស្តីពី បទពិសោធន៍ក្នុងការប្រមូល និងរៀបចំទិន្នន័យដឹកជញ្ជូន និងភ័ស្តុភារកម្ម ដោយ Transport Development and Strategy Institute (TDSI) នៃប្រទេសវៀតណាម ៦) បទបង្ហាញស្តីពី យុទ្ធសាស្ត្រជាតិក្នុងការអភិវឌ្ឍការដឹកជញ្ជូន និងភ័ស្តុភារកម្ម នៃប្រទេសឡាវ ដោយក្រសួងសាធារណការ និងដឹកជញ្ជូន នៃប្រទេសឡាវ។
លើសពីនេះទៀត ស្ថាប័ននីមួយៗ ក៏បានចែករំលែកអំពីបញ្ហាប្រឈម ដែលបានជួបប្រទះ និងដំណោះស្រាយ ក្នុងការគ្រប់គ្រងទិន្នន័យដឹកជញ្ជូន និងភ័ស្តុភារកម្ម។ ជាលទ្ធផល ស្ថាប័នពាក់ព័ន្ធនៃប្រទេសវៀតណាម, ឡាវ, ថៃ និងកម្ពុជា នឹងបន្តកិច្ចសហប្រតិបត្តិការនានាក្នុងវិស័យភ័ស្តុភារកម្ម តាមរយៈការរក្សាទំនាក់ទំនងជនបង្គោលពាក់ព័ន្ធនឹងកិច្ចការងារគ្រប់គ្រងទិន្នន័យដឹកជញ្ជូន និងភ័ស្តុភារកម្ម។
