កសាងសមត្ថភាពការងារតាមដានត្រួតពិនិត្យ និងវាយតម្លៃ (M&E) របស់មន្រ្តីអគ្គនាយកដ្ឋានភ័ស្តុភារកម្ម
គម្រោងសហប្រតិបត្តិការបច្ចេកទេស JICA ដំណាក់កាលទី១ បានចាប់ផ្តើមឡើងនៅខែតុលា ឆ្នាំ២០១៨ ដើម្បីកសាងសមត្ថភាពធនធានមនុស្សលើផ្នែកគោលនយោបាយ និងបទប្បញ្ញត្តិក្នុងវិស័យភ័ស្តុភារកម្មនៅក្នុងអគ្គនាយកដ្ឋានភ័ស្តុភារកម្ម និងបានបញ្ចប់នៅអំឡុងខែកុម្ភៈ ឆ្នាំ២០២០។ ដំណាក់កាលទី២ នៃគម្រោងបានបន្តអនុវត្តចាប់ពីចុងឆ្នាំ២០២០ និងរហូតមកដល់បច្ចុប្បន្ន។
គម្រោងនេះ បានផ្តល់ជំនួយបច្ចេកទេស ដើម្បីផ្តល់នូវជំនាញបច្ចេកទេសផ្នែករៀបចំប្រមូលនិងគ្រប់គ្រងទិន្នន័យភ័ស្តុភារកម្មនៅកម្ពុជា។ គោលបំណងសំខាន់នៃការបង្កើតមូលដ្ឋានទិន្នន័យភ័ស្តុភារកម្មគឺដើម្បី៖ (១) តាមដានត្រួតពិនិត្យវឌ្ឍនភាពនៃផែនការមេភ័ស្តុភារកម្ម, (២) ស្វែងយល់ពីផលប៉ះពាល់លើវិស័យភ័ស្តុភារកម្ម, (៣) វាយតម្លៃផលប៉ះពាល់លើធុរកិច្ច និង (៤) វាយតម្លៃផលប៉ះពាល់រួមលើផ្នែកសេដ្ឋកិច្ច។
តាមរយៈវគ្គបណ្តុះបណ្តាល “ការអនុវត្តការងារបណ្តើរ និងបណ្តុះបណ្តាលបណ្តើរ (On Job Training)” ក្នុងដំណាក់កាលទី២ ក្នុងឆ្នាំ២០២១នេះ ផ្តោតសំខាន់ទៅលើការរៀបចំរបាយការណ៍ភ័ស្តុភារកម្មប្រចាំឆ្នាំ ដែលបណ្តុះបណ្តាលដោយគ្រូបង្គោល JICA ដល់មន្ត្រីបច្ចេកទេសក្នុងនាយកដ្ឋានអង្កេត និងបូកសរុប នៃអគ្គនាយកដ្ឋានភ័ស្តុភារកម្ម ក្នុងការប្រមូលទិន្នន័យពីស្ថាបន័ពាក់ព័ន្ធទាំងវិស័យរដ្ឋនិងឯកជន, រក្សាទុកទិន្នន័យ, សរសេររបាយការណ៍, រៀបចំចងក្រង និងផ្សព្វផ្សាយរបាយការណ៍។ ទិន្នន័យនេះ គឺពិតជាមានសារៈសំខាន់ណាស់ ដើម្បីសិក្សា និងដោះស្រាយបញ្ហាប្រឈមនានាក្នុងវិស័យភ័ស្តុភារកម្ម និងជាមូលដ្ឋានសម្រាប់រាជរដ្ឋាភិបាលក្នុងការរៀបចំគោលនយោបាយ ដែលសមស្របបានទាន់ពេលវេលា។ ម៉្យាងវិញទៀត ទិន្នន័យភ័ស្តុភារកម្មក៏អាចជួយសម្រួលដល់ការសន្ទនាដ៏មានសារៈសំខាន់រវាងរដ្ឋ និងវិស័យឯកជន។