គម្រោង​សំដៅ​ដំឡើង​ប្រព័ន្ធ​ព័ត៌មានវិទ្យា​សម្រាប់​ការគ្រប់គ្រង​ចរាចរណ៍​នាវា (Vessel Traffic Management Information System - VTMIS) នៅ​តាម​ឆ្នេរសមុទ្រ​នៃ​ប្រទេស​កម្ពុជា សម្រាប់​ការឃ្លាំមើល​នាវា ដែល​ធ្វើដំណើរ​តាម​សមុទ្រ​ដោយ​មាន​ការដំឡើង​ប្រព័ន្ធ​ចំនួន ៦ រួមមាន ការជំនួស​ឧបករណ៍​ចាស់​ៗ និង​ការជួសជុល​មជ្ឈមណ្ឌល​ប្រព័ន្ធ​តាមដាន​នាវា (Vessel Tracking System - VTS) ដែល​មាន​ស្រាប់​, Radar​, AIS (Automatic Identification System)​, ITV (Industrial Television)​, វិទ្យុ​ទាក់ទង​នាវា (Very High Frequency - VHF) និង​ប្រព័ន្ធ​ព័ត៌មានវិទ្យា​សម្រាប់​ការគ្រប់គ្រង​ចរាចរណ៍​នាវា (VTMIS)​។ គោលបំណង​នៃ​គម្រោង គឺ​ធានា​ការ​ធ្វើ​នាវាចរណ៍​ប្រកបដោយ​សុវត្ថិភាព​ចំពោះ​នាវា ដែល​ចូល​ចត​និង​ចេញដំណើរ​ពី​កំពង់ផែ​ស្វយ័ត​ក្រុង​ព្រះសីហនុ​, ធានា​សន្តិសុខ​សម្រាប់​សកម្មភាព​សេដ្ឋកិច្ច​នៅ​សមុទ្រ​កម្ពុជា​, ទ្រទ្រង់​កំណើន​សេដ្ឋកិច្ច​របស់​កម្ពុជា​ដោយ​ធានា​សុវត្ថិភាព និង​សន្តិសុខ​សមុទ្រ​។ គម្រោង​នេះ​កំពុង​ដំណើរការ និង​អនុវត្ត​ដោយ​កំពង់ផែ​ស្វយ័ត​ក្រុង​ព្រះសីហនុ (​ក.ស.ស.) ដែល​ទទួលបាន​ការគាំទ្រ​ផ្នែក​ហិរញ្ញវត្ថុ ក្រោម​ជំនួយ​ឥត​សំណង​របស់​ប្រទេស​ជប៉ុន ដោយ​ផ្តល់​នូវ​អត្ថប្រយោជន៍​រួមមាន ការកាត់បន្ថយ​គ្រោះថ្នាក់​តាម​សមុទ្រ និង​កាត់បន្ថយ​ចំណាយ​ប្រតិបត្តិការ​នៅ​កំពង់ផែ​។